AKTUAL TV xəbər verir ki, Prezident nitqində bəzi vacib məsələlərə toxunmaqla yanaşı, həm də ATƏT -in Minsk Qrupunun münaqişə ilə bağlı mövqeyindən danışıb. Ölkə rəhbəri bildirib ki, Azərbaycan ATƏT-dən konkret addımlar gözləyir.
Prezident Ermənistanın baş nazirinin “Qarabağ Ermənistandır” iddiasının əslində, Minsk qrupunun formalaşdırdığı danışıqların mahiyyətini alt-üst etdiyini, əhəmiyyətsizləşdirdiyini vurğulayıb. ATƏT Minsk Qrupunun bu ifadəyə səssiz qalması isə haqsızlıqdır.
Sözügedən qurumun Ermənistan – Azərbaycan münaqişəsi ilə bağlı konkret münasibətini müstəqil şərh edən yazıçı, millət vəkili Aqil Abbasın fikrincə, biz ATƏT-lə münasibətlərimizə son qoymalıyıq:
“Dövlət başçımız dəfələrlə bu mövzuya toxunub və ATƏT-in yarıtmaz vəziyyətindən söz açıb. Belə davam etsə, biz bu təsisatla münasibətlərimizi kəsəcəyik. Ümumiyyətlə, ancaq ATƏT-dən canımızı qurtardığımız təqdirdə, Qarabağı işğaldan azad edə bilərik”.
A.Abbas dövlət başçısının uğurlu siyasətindən də söz açıb: “Cənab prezidentin bu müsahibəsi həm də hesabat idi. O, baş verənlər və gələcək planlar haqqında xalqa hesabat verdi. Mən hazırda Qarabağdayam. Seçicilərimlə görüşə gəlmişəm. Burada hamı Prezidentin siyasətini dəstəkləyir”.