Çinin əhalisi 1961-ci ildən bəri ilk dəfə olaraq 2022-ci ildə əvvəlki illə müqayisədə 850 min nəfər azalıb.
Aktualtv.az xəbər verir ki, Çin Milli Statistika Bürosunun məlumatına görə, Çin əhalisi 2022-ci ildə 2021-ci illə müqayisədə 850 min nəfər azalıb. 2022-ci ildə ölkədə 10,41 milyon insan öldüyü halda, 9,56 milyon körpə dünyaya gəlib. Beləliklə, 1950-ci illərin sonunda o vaxtkı lider Mao Tszedunun kənd təsərrüfatında kollektivləşdirmə praktikasından sonra on milyonlarla insanın quraqlıq və qıtlıq nəticəsində ölməsinin ardından 1961-ci ildən bəri ilk dəfə Çin əhalisi azaldı.
Bildirilib ki, ölkədə 2021-ci ildə 7,52 olan doğum səviyyəsi 2022-ci ildə 6,77-yə enib. Əvvəlki il 7,18 olan ölüm nisbəti 2022-ci ildə 7,37-yə yüksələrək 1976-cı ildən bəri qeydə alınan ən yüksək ölüm nisbətidir. Ümumi əhalinin sayı 1 milyard 411 milyon 750 min olaraq açıqlandı. Qeyd olunub ki, 16-59 yaş arasında olan əmək qabiliyyətli əhalinin sayı 875,56 milyon, 65 və yuxarı yaşda olan əhalinin isə 209,78 milyon nəfər təşkil edir.
