Federal Ehtiyat Sistemi faiz dərəcəsini 25 bənd artıra bilər. Analoji addım Avropa Mərkəzi Bankından da gözlənilir. Əsas məsələ isə faiz artımlarının nə qədər davam edəcəyidir.
Aktualtv.az xəbər verir ki, ötən həftə ABŞ-da məşğulluqla bağlı açıqlanan rəqəmlər ölkə iqtisadiyyatı üçün yumşaq eniş siqnalı verib. Çünki ABŞ iqtisadiyyatı 2022-ci ilin son rübündə proqnozdan daha artıq böyüyüb.
Belə ki, yeni mənzil satışları 2,3 faiz artıb. Şəxsi istehlak xərclərində isə 2,1 faiz azalma qeydə alınıb. Şirkətlərə gəlincə Teslanın gəlirləri 37 faiz artaraq 24,3 milyard dollara yüksəlib. Buna baxmayaraq 24,7 milyard dollarlıq proqnoz göstəriciyə çatmaq mümkün olmayıb. Maykrosoftun gəlirləri isə 2021-ci illə müqayisədə 12 faiz azalıb. General Motors və Conson da bazar proqnozlarını qarşılaya bilməyib. Analitiklər balans dövrünün davam etdiyinə diqqət çəkərək, Apple, Amazon, Alfabet və Meta kimi şirkətlərin bazarın istiqamətinə təsir edəcəyini bildirib.
Avropa Mərkəzi Bankının faiz artımı məsələsinə gəlincə isə, ekspertlər hesab edir ki, bank faiz artımını dayandırmasa belə ləngidə bilər. Qitə iqtisadiyyatındakı qarışıq siqnallar buna təsir edir. Təbii qazın ucuzlaşması isə istehsal xərcləri və inflyasiya baxımından rahatlamanı təmin edə bilib.
Büllur Məmmədova / aktualtv.az