Zəlzələdən zərər çəkən insanların sığınacağı üçün NATO Türkiyəyə yardım məqsədilə 1000 konteyner göndərəcək.
Aktualtv.az xəbər verir ki, Şimali Atlantika Müqaviləsi Təşkilatının İtaliyanın Taranto şəhərində yerləşən Cənub Əməliyyatlar Mərkəzinin anbarında saxlanılan konteynerlər daşınması üçün hazır vəziyyətə gətirilib. Prosesə gələn həftə başlanılacaq. NATO-ya məxsus istilik vasitələri, generatorlar, müalicə ləvazimatları ilə təhciz edilən konteynerlərdən ən azı iki minədək insanın istifadə edəcəyi gözlənilir.
Dünya Səhiyyə Təşkilatı isə zəlzələni son 100 ilin Avropada ən dəhşətli təbii fəlakəti kimi dəyərləndirib və beynəlxalq ictimaiyyəti hərtərəfli yardıma çağırıb. Hazırda 26 milyon insanın dəstəyə ehtiyacı var. UNICEF-in məlumatına görə, zəlzələ yeddi milyon uşağın həyatına təsir göstərib, minlərlə uşaq həlak olub.
Qeyd edək ki, Türkiyənin zəlzələ baş verən 10 vilayətində 4,6 milyon uşaq yaşayır.
Etibar Məmmədov / aktualtv.az