ABŞ-da on milyonlarla toyuqun ölümünə səbəb olan və yumurta qiymətlərini artıran quş qripi epidemiyasının qarşısının alınması üçün toyuqların peyvənd edilməsinin planlaşdırıldığı açıqlanıb.
Aktualtv.az xəbər verir ki, ötən ilin əvvəlində ABŞ-da başlayan quş qripi epidemiyası ölkə tarixində ən böyük epidemiyaya çevrilərək, 47 ştatda yetişdirilən 58 milyondan çox quşu, eləcə də vəhşi təbiətdəki quşları əhatə edib. Ehtimal olunur ki, o, artıq tülkü, yenot və ayı kimi heyvanlar arasında yayılıb. Buna səbəb olan H5N1 kimi tanınan virusun mutasiyaya uğrayaraq insanlar arasında daha asan yayılmağa başlaya biləcəyi qorxuları artır. Xəstəliklərə Nəzarət və Qarşısının Alınması Mərkəzlərinin mütəxəssisləri insanlar arasında pandemiya riskinin aşağı olduğunu deyirlər.
Heyvandarlığın sağlamlığına cavabdeh olan federal Kənd Təsərrüfatı Departamentinin rəsmiləri, potensial quşçuluq peyvəndlərini sınaqdan keçirməyə başladıqlarını və ev quşları üçün geniş miqyaslı quş qripinə qarşı peyvənd proqramı haqqında sənaye liderləri ilə danışıqlar apardıqlarını elan ediblər. Artıq təsərrüfat quşları quş çiçəyi kimi yoluxucu quşçuluq xəstəliklərinə qarşı peyvənd olunur.
Adları çəkilməyən Ağ Ev rəsmiləri deyirlər ki, ev quşlarının peyvənd edilməsi onların nəzərdən keçirdikləri yeganə addım deyil. Təcili addım olaraq, quşçuluq təsərrüfatlarının gücləndirilmiş dezinfeksiya prosedurları kimi biotəhlükəsizlik tədbirləri vasitəsilə qorunması təşviq ediləcək.
Murad Həsənov / aktualtv.az
