Avropa İttifaqı (Aİ) Rusiyaya qarşı yeni sanksiyalar çərçivəsində 20-dən çox bankın SWIFT beynəlxalq ödəniş sistemindən çıxarılmasını nəzərdən keçirir.
Bu barədə “Bloomberg” anonim mənbələrə istinadən məlumat yayıb.
“Ukraynaya qarşı müharibəni dayandırmaq üçün Moskvaya təzyiqi artırmağa yönəlmiş yeni sanksiyalar çərçivəsində Aİ həm də Rusiya neftinin qiymətinin yuxarı həddinin aşağı salınması və “Şimal axını 1” və “Şimal axını 2” qaz kəmərlərinə qadağa qoyulması imkanlarını nəzərdən keçirir”, – məlumatda deyilir.
Mənbələr bildiriblər ki, Avropa Komissiyası bu tədbirlərlə bağlı Aİ-yə üzv dövlətlərlə məsləhətləşmələr aparır.
Onların sözlərinə görə, mümkün məhdudiyyətlərin vaxtı ilə bağlı qərar hələ qəbul edilməyib. Aİ sanksiyaları bütün üzv dövlətlərin təsdiqini tələb edir və rəsmi təklif edilənə və qəbul edilənə qədər dəyişdirilə bilərlər.
