71-ci “Avroviziya” müsabiqəsi növbəti ilin may ayında Burqas şəhərində (Bolqarıstan), “Arena Burgas”da baş tutacaq.
Bu barədə Avropa Yayım İttifaqı (EBU) məlumat yayıb.
“Avropa Yayım İttifaqı (EBU) və Bolqarıstan Milli Televiziyası (BNT) məmnuniyyətlə bildirir ki, Burqas şəhəri 2027-ci ilin may ayında 71-ci Avroviziya mahnı müsabiqəsinin keçiriləcəyi yer olaraq seçilib. Avroviziya həftəsi ərzində Burqasda müsabiqəyə həsr olunmuş zəngin tədbirlər proqramı keçiriləcək”, – EBU-nun məlumatında bildirilib.
Müsabiqənin birinci yarımfinalı mayın 11-də, ikinci yarımfinalı isə mayın 13-də baş tutacaq. Final mayın 15-də olacaq. Ənənəyə görə, müsabiqə ötən il qalib gəlmiş ölkədə keçirilir.
“Avroviziya” ilk dəfə olaraq Bolqarıstanda keçiriləcək. Ölkənin təmsilçisi, müğənni Dara bu il “Bangaranga” mahnısı ilə qələbə qazanıb.
