“Mən çox istərdim ki, bugünkü müzakirədə Maliyyə Nazirliyinin də nümayəndəsi olsun, çünki maliyyə məsələsi üzə çıxanda Mədəniyyət Nazirliyinin edəcəyi bir şey olmur”.
Bunu Bakı Musiqi Akademiyasının rektoru, Xalq artisti Xalq artisti Fərhad Bədəlbəyli Milli Məclisin Mədəniyyət Komitəsinin “Prezident İlham Əliyevin VII Ümumdünya Mədəniyyətlərarası Dialoq Forumundakı çıxışından irəli gələn prioritetlər: Mədəniyyətlərarası dialoq və Azərbaycanın mədəni diplomatiyası” mövzusunda keçirdiyi ictimai müzakirədə deyib.
“Çünki onlar teatra çox nadir hallarda gedirlər, çox nadir hallarda konsertlərdə iştirak edirlər. Ona görə də mədəniyyət deyəndə onların təsəvvüründə yalnız hansısa toyda oxuyan müğənni və ya şou-biznes nümayəndəsi canlanır”, – Xalq artisti əlavə edib.
Fərhad Bədəlbəyli balet artistlərinin pensiyaya çıxması ilə bağlı problem olduğunu da deyib:
“55 yaşında insan balet oynaya bilərmi? Belə elementar problemlər, təəəssüf ki, bu gün də həllini tapmayıb”.
