Gürcüstandakı etirazlarda çevik polis qrupları Tbilisi şəhərinin mərkəzində xarici agent qanununa etiraz edən kütləni dağıtmaq üçün proporsional güc və “xüsusi tədbirlərə” əl atmalı olub.
Aktualtv.az xəbər verir ki, bu barədə ölkənin Daxili İşlər Nazirliyi bəyanat yayıb. Məlumata görə, baş verən zorakılıq nəticəsində bir neçə polis əməkdaşı yaralanıb. Bəzi polis maşınlarına və avadanlıqlarına ziyan dəyib. Çərşənbə axşamı dinc şəkildə başlayan mitinq bir qrup etirazçının ölkə parlamentindən çıxışını bağlamağa cəhd etməsi zamanı zorakılığa çevrilib.
Xatırladaq ki, Gürcüstan parlamentariləri çərşənbə axşamı xarici agentlər haqqında qanun layihəsini birinci oxunuşda qəbul ediblər. Parlamentin iclası zamanı qanun layihəsinin minlərlə əleyhdarı binanın qarşısına toplaşıb. Polislə toqquşmalar səsvermə baş tutandan az sonra başlayıb.
Fevral ayında Gürcüstan parlamenti xarici agentlər haqqında qanun layihəsinin iki variantını, o cümlədən gürcü iterasiyasını və amerikan variantını, yəni Amerika Xarici Agentliklərin Qeydiyyatı Aktının tərcüməsini qeydə alıb. Gürcü variantına görə, xarici agent öz maliyyəsinin 20%-dən çoxunu xarici mənbələrdən alan hüquqi şəxs, o cümlədən media orqanı kimi müəyyən edilir. Qanun layihəsi fiziki şəxslərə şamil edilməyəcək, Amerika versiyası isə həm hüquqi, həm də fiziki şəxslərə şamil edilir və cinayət məsuliyyətini nəzərdə tutur. Xarici agentlər anlayışının qanunda təsbit edilməsi təşəbbüsü həm Gürcüstan müxalifəti, həm də Qərb siyasətçiləri tərəfindən ciddi tənqidlərə səbəb olub. Gürcüstan prezidenti Salome Zurabişvili qanun layihəsi qəbul olunarsa, ona veto qoyacağını vəd edib.
Büllur Məmmədova / aktualtv.az
